අවංක පොලිස් නිලධාරියෙකු වන සීතාරාම්, ශිවමොග්ගා දිස්ත්රික්කයේ ආනේගද්දෙ (Anegadde) නම් ග්රාමීය පොලිස් ස්ථානයට මාරු වී එයි. නමුත් ඔහුගේ රාජකාරි ජීවිතය කණපිට හැරෙන්නේ, ඔහු වැඩ භාරගත් පළමු දිනයේම ඔහුගේම නිවස ඉතා සූක්ෂම ලෙස කොල්ලකෑමට ලක්වීමත් සමඟිනි. මාළු වෙළෙන්දෙකු වන නාගා, විදුලි කාර්මික දේවා, සහ සීනා ඇතුළු කල්ලියක් මෙම සූක්ෂම සොරකම් පිටුපස සිටියි. නමුත් මේ සොරකම් ගැන විමර්ශනය කරන අතරතුරදී සීතාරාම්ට ඊට වඩා බිහිසුණු ජාලයක් හමුවෙයි. එනම්, අතීතයේ වසා දැමූ Case No. 18 නමැති ලිපිගොනුවයි. පොලිස් නිලධාරීන්ගේ බිරින්දෑවරුන් පමණක් ඉලක්ක කරමින්, ඔවුන්ගේ ගෙල කඩා (Cervical Fracture) ඉතාම අමානුෂික ලෙස ඝාතනය කරන අභිරහස් ඝාතකයෙක් සිටින බව ඔහුට වැටහේ. ඝාතකයා එසේ කරන්නේ ඇයි? බෙන්නෝයි ජෝර්ජ් නමැත්තාගේ ගැබිණි බිරිඳ වන රීටා ගේ අහඹු මරණයට පොලිසියෙන් පළිගැනීමක්ද? මේ සියලු අභිරහස් ලිහා ගැනීමට සීතාරාම්ට හැකිවේවිද?
